Рэзалюцыя датычна свабоды сумлення, прынятая на семінары Lingua Franca Сусветнай Студэнцкай Хрысціянскай Федэрацыі

Рэквізiты
Прыняты: 
Львоў, Украіна 25-30 траўня 2009 г

Мы, шматстайная супольнасць еўрапейскай хрысціянскай моладзі, маючы разнастайныя погляды, падзяляем наступныя перакананні:

Падтрымліваючы вызначэнне свабоды сумлення, як адзначана ў арт. 18 Усеагульнай дэкларацыі правоў чалавека, мы лічым сваім абавязкам працаваць дзеля свабоды веравызнання і роўнасці ўсіх людзей абіраць, практыкаваць і дзяліцца сваёй верай. Мы выражаем салідарнасць з тымі, хто змагаецца за свабоду сумлення і з усімі групамі, чые правы ўціскаюцца.

Вызнаючы, што свабода сумлення ёсць правам чалавека, і як такое – неад'емнае, мы мусім паважаць правы тых, з кім мы не згодныя. Мы прызнаем правы рэлігійных меншасцей – хаця мы цяпер і з'яўляемся большасцю, заўтра мы можам стаць меншасцю ў іншым месцы ці нават на сваёй радзіме. Мы верым і спадзяемся, што, чым больш мы забяспечваем правы іншых, тым больш нашыя ўласныя правы будуць забяспечаныя.

Вера не мусіць выкарыстоўвацца як сродак палітычнай маніпуляцыі. Хаця людзі веры маюць адказнасць за палітыку і грамадства, мы асуджаем палітычную маніпуляцыю цэркваў з боку органаў ўлады і палітычных партый.

Свабода сумлення мусіць паважацца на ўсіх узроўнях грамадства, органамі ўлады, судамі, грамадзянская супольнасцю, цэрквамі і школай. Выказванні непрыязнасці выклікаюць дыскрымінацыю і гвалт, яны распаўсюджваюцца на палітычную сферу, у царкву і сродкі масавай інфармацыі, і таму мусяць быць адзначаныя і асуджаныя. Мы маем адказнасць адукоўваць і прыцягваць увагу датычна свабоды сумлення – неталерантнасць часта выклікаецца недахопам адукацыі і ведаў па гэтым пытанні.

Мы маем абавязак сачыць за сітуацыяй датычна свабоды сумлення ў нашых месцах пражывання, супольнасцях, краінах і ва ўсім свеце і мы не можам заставацца маўклівымі, калі мы даведваемся аб яе парушэннях.

Мы мусім і надалей працаваць дзеля свабоды сумлення. У нашых грамадствах, у Еўропе і ў іншых месцах, свабода многіх групай і асобаў парушаецца. Мы хацелі звярнуць асаблівую ўвагу на сітуацыю ў Беларусі, дзе заканадаўства выкарыстоўваецца як сродак уціску цэркваў, рэлігійных меншасцяў і наогул усіх, хто змагаецца за свае правы.

Гэтыя правы і абавязкі датычацца ўсіх і на ўсіх узроўнях жыцця мусіць падтрымлівацца талерантнасць. Разнастайнасць – наш скарб. Мы ўсе прыкліканыя да дзеяння ў органах улады і ў няўрадавых арганізацыях, у нашых цэрквах, універсітэтах і грамадствах. Мы заклікаем свае цэрквы, супольнасці і краіны далучыцца да нас у нашых перакананнях працаваць дзеля свабоды сумлення.

Няхай Бог свабоды і праўды, Хрыстос, які быў пераследаваныя і вызваляючы Святы Дух натхняць рост свабоды сумлення і талерантнасці ў нашым свеце.

Сусветная Студэнцкая Хрысціянская Федэрацыя (Еўрапейскі рэгіён)

Семінар Lingua Franca

«Свабода сумлення як права чалавека»

Львоў, Украіна 25-30 траўня 2009 г.

Пераклад на беларускую мову - партал "Царква"