Гісторыкі адзначаюць змяненні ў традыцыйнай канфесійнай ідэнтыфікацыі беларусаў у памежных рэгіёнах краіны

Аўтар: 
Гаравы Марат, БелаПАН

У памежных рэгіёнах краіны назіраюцца змяненні ў традыцыйнай канфесійнай ідэнтыфікацыі беларусаў, заявіла 12 лютага доктар гістарычных навук Галіна Каспяровіч на прэзентацыі навукова_папулярнага калектыўнага выдання «Беларусы: сучасныя этнакультурныя працэсы», якое выйшла ў выдавецтве «Беларуская навука» накладам 1 тыс. экземляраў.

Паводле яе слоў, па выніках даследаванняў, праведзеных у 2007 годзе на мяжы Беларусі з Украінай, Польшчай і Расіяй, выяўлены адыход ад сямейнай рэлігійнай традыцыі. Так, прыкладна 5–6% даследаваных адышлі ад праваслаўя, якое на працягу вякоў дамінавала ў іх сямейным асяроддзі, сказала навукоўца. Матывамі такога адыходу яна лічыць нявер’е ці часам звязаны са шлюбам пераход ў іншую канфесію, у тым ліку ў пратэстантызм. Разам з тым, паводле яе слоў, калі ў Гомельскай вобласці трохі ўзрасла колькасць католікаў, то ў Брэсцкай і Гродзенскай яна крыху знізілася. «Пра гэта трэба задумацца і працягнуць даследаванні», — мяркуе Каспяровіч.

Як адзначыла навукоўца, большасць вернікаў пражывае ў заходніх рэгіёнах краіны. Таксама ўзмацняецца грамадзянская ідэнтычнасць людзей. З кожным годам усё больш грамадзян лічаць сябе беларусамі незалежна ад этнічнага паходжання.

Адна з аўтараў выдання, Аляксандра Гурко, паведаміла, што кніга стваралася навукоўцамі Інстытута этнаграфіі і фальклору імя Кандрата Крапівы Нацыянальнай акадэміі навук Беларусі. На выснове этнаграфічных, палявых, ілюстрацыйных і архіўных матэрыялаў на пачатку 1990-х гадоў пачала выходзіць серыя «Беларусы», якая зараз налічвае 12 тамоў. У серыі прадстаўлены ўсе бакі жыцця нацыі — ад промыслаў і рамёстваў на пачатку засялення беларускіх зямель да кінамастацтва нашага часу.

Новае ілюстраванае выданне прадстаўляе сучасныя этнакультурныя працэсы за апошнія 20 гадоў, у асноўным звязаныя з гісторыяй незалежнай Беларусі. У кнізе раскрываюцца пытанні пахожання беларусаў, сучасных дэмаграфічных працэсаў, сямейных традыцый, дзяржаўных, каляндарных і рэлігійных свят, народнага і прафесійнага мастацтву Беларусі.

Як адзначыла яшчэ адна аўтар выдання Ірына Калачова, на пачатку XXI стагоддзя беларуская гарадская сям’я захавала уклад сямейнага жыцця з яго старадаўняй традыцыяй вяселля, радзільным абрадам з удзелам хроснага бацькі, а таксама святамі старажытнагя народнага каляндара. Зараз навукоўцы інстытута завяршаюць працу над трохтомнікам «Гісторыя культуры Беларусі».

Гісторыкі адзначаюць змяненні ў традыцыйнай канфесійнай ідэнтыфікацыі беларусаў у памежных рэгіёнах краіны - «За свабоднае веравызнанне» № 25, студзень - сакавік 2010

Дапісаць новы камэнтар

Значэньне поля ня будзе паказанае публічна ні ў якім разе.
CAPTCHA
This question is for testing whether you are a human visitor and to prevent automated spam submissions.
6 + 12 =
Solve this simple math problem and enter the result. E.g. for 1+3, enter 4.